Lev 19 | ZomZIV | STEP | TOPA in Moses tungah,

Leviticus 19

Thukham Tuamtuamte

1 TOPA in Moses tungah, 2 “Israel mipi khempeuh hopih inla amaute tungah: ‘Keimah TOPA note Pasian siangtho ka hi manin note zong siangtho un. ^a

3 “‘Note a kuamahpeuh in na nu na pate uh zahtakin ka Sabbath-te na tang ding uh hi. Keimah TOPA note Pasian ka hi hi. ^b

4 “‘Milimte lamah nga kei un, ahikeh a kisung tawm pasiante bawltawm kei un. Keimah TOPA note Pasian ka hi hi. ^c

5 “‘TOPA tungah kilawmtakna biakna ^{▼▼19.5 Tang ngeina-in kilemna biakna} na piak uh ciangin note tanga kisang thei dingin hih bang zia-in pia un. 6 Na piak ni uh ahikeh a zing ciangin kine khin ding hi; a ni thum ni dong a val lai a om leh pel loin kihaltum ding hi. 7 A ni thumni-in a kine a om leh a nin hi-a, a kisang kei ding hi. 8 A ne mi peuhmah in ama mawhna a khu ding hi, bang hang hiam cih leh amah in TOPA tungah a siangtho na a buahsak khin hi; tua mipa a mipihte panin a kikhenkhia pelmawh ding hi. ^e

9 “‘Na leitang-uah an na lak uh ciangin lonawl cin dong la tektek kei unla a sangh zong khawm siang kei un. 10 Na lenggah lo ah a sangh khawm kei inla a nuaikiate zong tawm kei in. Mizawngte leh pemtate adingin tuate nusia in. Keimah TOPA note Pasian ka hi hi. ^f

11 “‘Gu kei un. ^g

“‘Zuau gen kei un. ^h

“‘Khat le khat kikhem kei un.

12 “‘Amaan lopi-in kei min lo-in kiciam kei unla; note Pasian min daisak kei un. Keimah TOPA ka hi hi. ⁱ

13 “‘Na vengte uh niambawlin mawksuh kei un. ^j

“‘Nasem dinga na cialte thaman zan khat zong dekbawl kei un. ^k

14 “‘Mittawte hamsiat kei un, ahikeh mittawpa suih khak dingin na khatpeuh koih kei un, na Pasian uh kihta zaw un. Keimah TOPA ka hi hi. ^l

15 Thutang lehhei kei un; mizawngte khentuam kei un, ahikeh a haute angvan tuam kei un; na vengte uh thu a hoihin khensak zaw un. ^m

16 “‘Na mipihte uh lakah mi gensia-in kawivak kei un.

“‘Na vengte uh nuntakna a beisak thei na bangmah sem kei un. Keimah TOPA ka hi hi. ⁿ

17 “‘Na lungsim sunguah na sanggampa muhdah kei un. Na vengpa uh khialhna na khialhpih loh nadingun amah kiciantakin tai un. ^o

18 “‘Na mipihte uh khatpeuh tungah phulaknopna ahikeh lungsima langneihna nei kei un, ahi hangin nomau na ki-it bangun na vengte uh it un. Keimah TOPA ka hi hi. ^p

19 “‘Ka thukipte zui in,

“‘Ganhing a nam kibang lote ah bah kei un.

“‘Na lo lai-uah khaici nam nih cingkhawm kei un.

“‘Khau namnih kigankhawm puan silh kei un. ^q

20 “‘Pasal khat in midang khat tawh kiciam khin napi a kitankhia nai loin a suakta nai lo a sila numei khat a luppih leh a kituak zah dan kipia ding hi. Thah ding ahi nai kei hi, bang hang hiam cih leh tuanu a kisuaktasak nai kei hi. 21 Bangbang ahi zongin tuapa in Kikhopna Puanbuk lutna-a TOPA tungah khialhna hanga biak nading tuutal khat a puak pelmawh ding hi. 22 Ama khialhna hanga biakna tuutal tawh a bawlsa a mawhna tangin, siampipa in TOPA mai-ah thoihdamna bawlsak dinga, tua ciangin ama mawhna kimaisak ding hi. ^r

23 “‘Tua gamah lutin sing nam khat peuh na suan uh ciangin agah a kikham ^{▼▼19.23 Hebrew in vunat loh} in ngaihsun un. Kum thum sung a kikham ^{▼▼19.23 Hebrew in vunat loh}in na ngaihsun ding uh hi; tuate a kine peuhmah kei ding hi. 24 A kum lina kumin a siangtho hi dinga, TOPA mai-ah phatna-a biakna khat ahi hi. 25 Ahi hangin a kum ngana kumin a gah na ne thei ding uh hi. Hici bangin na khawhsate uh gah a khang ding hi. Keimah TOPA note Pasian ka hi hi. ^u

26 “‘Sa khatpeuh a sunga sisan omlai pi-in ne kei un. ^v

“‘Aisanna ahikeh bumna nasepin nei kei un. ^w

27 “‘Note in na basam uh met kei un, ahikeh na khamul mongte uh zong na theu kei ding uh hi. ^x

28 “‘Misite hangin na pumpi uh kuikek ahikeh na citung uh gialsak kei un. Keima TOPA ka hi hi.

29 “‘Na tanute uh kizuaksakin a vaang uh kiamsak kei un; tua hi kei leh tua gam kizuakna suak dinga gitlohna tawh a dim ding hi.

30 “‘Ka Sabbatth-te tang unla ka mun siangtho zahtak un. Keimah TOPA ka hi hi. ^y

31 “‘Ai siamte zuan kei un, ahikeh dawi lawm zong kei un, ahang in, tuate-in na kibuahsak kha ding uh hi. Keimah TOPA note Pasian ka hi hi. ^z

32 “‘A teekte mai-ah ding unla, a upazaw peuhmah zahtakna lakin, na Pasian uh zahtak un. Keimah TOPA ka hi hi. ^aa

33 “‘Na gamuah pemta khatin nang hong belh ciangin amah bawlsia kei in. 34 No tawh a tengkhawm pemta khat, no tualsuakte khatmah bangin kibawl pelmawh ding hi. Nangmah na ki-it bangin amah it in; ahang in note zong Egypt ah pemta na hi uh hi. Keimah TOPA note Pasian ka hi hi. ^ab

35 “‘A sau tehna, a gik khaina ahikeh a lian tehna na teh uh ciangin thumaan loin hih kei un. 36 Amaan-a tehna, a maan-a khaina ephah ^{▼▼19.36 Ephah khat in phazah nei lo hi.} maan le hin ^{▼▼19.36 Hin khat a tui lamsang tehna hi.} maan zang un. Keimah TOPA note Pasian Egypt pana hong paikhiatpihpa ka hi hi.

37 “‘Ka thukip khempeuh le ka thukham khempeuh zui-in tangun. Keimah TOPA ka hi hi, ci hi,’ ci un,” a ci hi. ^ae